Khit Thit Afternoon News | 4 October 2026

Description: Khit Thit သတင်းဌာန၏ အောက်တိုဘာ ၄ ရက် နေ့လယ်ပိုင်း ရုပ်သံသတင်းအစီအစဉ်

By ရန်ကုန်ခေတ်သစ်

ဒီကနေ့ အောက်တိုဘာ ၄ ရက် နေ့လယ်ပိုင်း တင်ဆက်ပေးမယ့် သတင်းတွေကတော့
-ကရင်ပြည်နယ်၊ မြဝတီမြို့ ကြံခင်းလမ်းရှိ BGF ဗိုလ်မှူး မုတ်သုန်ပိုင် အမှတ် ၁ BGF ဂိတ်ဝင်းအတွင်း တရုတ်ကျားဖြန့်ငွေလိမ်လုပ်ငန်းတွေဟာ စက်တင်ဘာလ အတွင်း သတင်းပေါက်ကြားပြီးနောက် မဲကနယ်ဘက်ကို ယာယီပြောင်းရွှေ့ခဲ့ပေမယ့် အောက်တိုဘာ ၁ ရက်ကစပြီး ဂိတ်ဝင်းအတွင်း ပြန်ဝင်လာကာ လုပ်ငန်းတွေ ပြန်လည်လည်ပတ်နေတယ်လို့ ကရင်စစ်ရေး သတင်းရင်းမြစ်က ရန်ကုန်ခေတ်သစ်ကို ပြောပါတယ်။

- ရှမ်းပြည်နယ်မြောက်ပိုင်း၊ မိုးမိတ်မြို့အနီးမှာ စစ်ကောင်စီတပ်ရဲ့ အရေးပါတဲ့ ရွှေမြင်တင်ဗျူဟာကုန်း တိုက်ခိုက်သိမ်းပိုက်ခံရပြီးနောက် စစ်ကောင်စီဘက်က စစ်အင်အား ၁,၀၀၀ နီးပါး ထပ်မံဖြည့်တင်းထားတာ ကြောင့် လာမယ့်ရက်ပိုင်းအတွင်း တိုက်ပွဲတွေ အလွန်ပြင်းထန်လာနိုင်တယ်လို့ KIA စစ်ရေးသတင်း ရင်းမြစ်က ရန်ကုန်ခေတ်သစ်ကို ပြောဆိုပါတယ်။

- မကွေးတိုင်း၊ ဂန့်ဂေါမြို့နယ်မှာ အကြမ်းဖက် စစ်တပ်က ဖမ်းဆီးထားတဲ့ ဒေသပြည်သူ အမျိုးသား ၅ ဦး ပြန်လည်လွတ်မြောက်ရေးအတွက် မြစ်သာဆည်ပေါ်ကို ဆန်အိတ် ၄၀၀ နဲ့ ရိက္ခာခြောက်တွေ လာရောက်ပို့ပေးဖို့ ခလရ (၅၀) တပ်က မိသားစုဝင်တွေဆီ ဆက်သွယ်ပြီး ခြိမ်းခြောက် တောင်းခံခဲ့တယ်လို့ ယောအလင်းတန်း မှ တာဝန်ရှိသူက ရန်ကုန်ခေတ်သစ်ကို ပြောပါတယ်။

- အမေရိကန်စစ်တပ်က တပ်ဖွဲ့ဝင် ၉,၀၀၀ ခန့်ကို သင်္ဘောအုပ်စုတွေနဲ့အတူ အရှေ့အလယ်ပိုင်းဒေသကို ထပ်မံစေလွှတ်နေပြီး အဲဒီထဲမှာ လေယာဉ် တင်သင်္ဘော တစ်စင်းလည်း ပါဝင်တယ်လို့ အမေရိကန် အစိုးရ အရာရှိတစ်ဦးက ပြောတဲ့ သတင်းအပါအဝင် နေ့လယ်ခင်းသတင်းတွေကို တင်ဆက်ပေးပါမယ်။ Close description